Расте бројот на загинати во земјотресот во Јапонија, издадено е предупредување за обилни врнежи и свлечишта во погодените области

Поради земјотресот, издадени се предупредувања за цунами, а временската прогноза предвидува обилни врнежи во погодените области, што, пак, може да доведе до одрони и лизгање на земјиштето и да предизвика дополнителна штета на полуурнатите објекти и уште поотежната потрага по преживеаните

Бројот на загинати во разорниот земјотрес што на првиот ден од годинава ја погоди Јапонија се искачи на 64. Се стравува оти бројот на загинати може да се зголеми поради урнатините и непристапниот терен кои им отежнуваат на спасувачите во потрагата по преживеани. Се верува дека под урнатите згради има десетици луѓе.

Префектурата Ишикава и околните области утринава беа погодени од нов земјотрес со јачина од 4,9 степени според Рихтеровата скала – еден од десетиците последователни потреси што следуваа по плиткиот, но разорен земјотрес со јачина од 7,6 степени од пред два дена.

Експертите велат дека првите 72 часа по земјотресот се особено критични во потрагата по преживеани бидејќи шансите за преживување значително се намалуваат по три дена.

„Поминаа повеќе од 40 часа. Ова е трка со времето и чувствувам дека се наоѓаме во критичен момент. Добивме извештаи дека многу луѓе сè уште чекаат спас под урнатините на зградите. Владата ќе направи сè што може, со врвен приоритет за спасувањето животи“,

изјави за новинарите јапонскиот премиер Фумио Кишида.

Јапонскиот премиер најави и дека се зголемува бројот на војници во регионот погоден од земјотресот од сегашните 1 000 на 2 000. Армијата со помош на хеликоптери доставува помош до погодените области.

Поради земјотресот, издадени се предупредувања за цунами, а временската прогноза предвидува обилни врнежи во погодените области, што, пак, може да доведе до одрони и лизгање на земјиштето и да предизвика дополнителна штета на полуурнатите објекти и уште поотежната потрага по преживеаните.