Македонскиот ракомет повторно е завиен во црно откако денеска почина Илија Темелковски, легендарен ракометар и тренер чие име воедно ќе остане запишано и како еден од најуспешните селектори на македонската репрезентација.
-Почина Иле Темелковски – човек кој го посвети сиот свој работен век на ракометот, ракометната и спортската јавност изгубија вреден спортски работник , кој беше силно и неуморно посветен кон ракометот. Ракометната Федерација на Македонија упатува искрено и длабоко сочуство до семејството на Темелковски, се огласија од РФМ.
Темелковски најголемиот дел од својата играчка кариера ја мина во дресот на Пролет, клуб чиј дел беше до ден денеска, извршувајќи ја функцијата на координатор во младинската школа на скопскиот суперлигаш. Претходно, тој во неколку наврати седеше на клупата на Пролет, во последните години помагајќи во периодите кога доаѓаше до промени на кормилото на овој клуб.
Името на Темелковски секогаш ќе остане запаметено како предводник на младинската репрезентација што стигна до четврто место во 2002 година, а последен успешен ангажман како селектор му беше како предводник на У21 селекцијата во Алжир, кога Македонија предводена од него на клупата, со Талески, Кузмановски… стигна до шестото место на овој младински мундијал.
Темелковски беше селектор на А-репрезентацијата на Македонија на СП 2009 во Хрватска кога под негово водство нашите најдобри ракометари направија значаен исчекор на големите натпреварувања, минувајќи ја првата групна фаза и на крајот се пласираа на 11. место во светскиот ракомет.
Извор: kurir.mk
