МОСКВА (АА) – Претседателот Владимир Путин денес изјави дека Русија ќе го суспендира учеството во единствениот преостанат договор за контрола на оружјето со САД, јавува Анадолу.
Во обраќањето пред рускиот Парламент, познат и како Федерално собрание, во главниот град Москва, Путин рече дека договорот Нов СТАРТ е потпишан во фундаментално различна политичка реалност и повеќе не ја одразува ситуацијата.
Тој рече дека Вашингтон вовел антируски санкции, кои ја спречиле Москва да одржува „непречени инспекции“ на територијата на САД и соодветно на тоа, создал „очигледни еднострани предности за американската страна“.
Тој, исто така, рече дека податоците собрани од американската војска за време на инспекциите може да бидат префрлени на украинската Армија за удари врз стратешките воени објекти на Русија.
Тој, исто така, потсети како НАТО побарал од Русија да продолжи со инспекциите и изразил желба да стане страна на договорот.
„Ваквата изјава е одамна задоцнета. На крајот на краиштата, има повеќе од една нуклеарна сила во НАТО. САД, Велика Британија и Франција исто така имаат нуклеарни арсенали“, рече Путин.
„Велика Британија и САД ги развиваат своите нуклеарни капацитети, кои се насочени и против Русија“, рече тој.
„Принуден сум да објавам денеска дека Русија го суспендира своето учество во Договорот за намалување на стратешкото оружје (Нов СТАРТ). Повторувам – не се повлекува од договорот, го суспендира своето учество“, рече тој.
Путин рече дека е свесен за плановите на САД да тестира ново нуклеарно оружје и му наложи на руското Министерство за одбрана да се подготви за тестирање на руски нуклеарни оружја како одговор.
„Проактивно, нема да тестираме ништо, но ако САД го тестираат своето нуклеарно оружје, ние ќе го сториме истото тоа како одговор“, рече тој.
Потпишан во 2010 година и продолжен во 2021 година за уште пет години, договорот има за цел да ги контролира и намали стратешките нуклеарни сили што ги користат САД и Русија.
Извор: www.aa.com.tr
