Рускиот претседател зборувајќи за „Комерсант“ самиот потврдил дека на состанокот со Евгениј Пригожин и неколкумина високи офицери на платеничката група кој се одржал пет дена по неуспешниот пуч на „Вагнеровци“ предложил раководењето со паравоената формација да го преземе искусен и познат човек од редовите на „Вагнер“
„Многумина климнаа потврдно со главите откако ја пренесов оваа идеја“, изјави Владимир Путин
Најверојатно нов лидер на „Вагнер“ ќе биде Андреј Трошев познат под прекарот „Седокосиот“. Станува збор за пензиониран полковник на руската армија и еден од основачите на „Вагнер“. Трошев е роден во април 1953 година во Ленинград, во поранешниот Советски Сојуз. Тој е ветеран од војните во Чеченија и Авганистан. За неговата служба во Авганистан, Трошев беше одликуван со два ордени на Црвена звезда – одликување на Советскиот Сојуз за исклучителна служба. Одликуван бил и за службата во Чеченија.
Според руските независни медиуми „Седокосиот“ бил дел од специјалниот одред за брз одговор на Северозападниот федерален округ на руското Министерство за внатрешни работи.
За неговата блискост со руските раководни структури зборува и податокот дека бил меѓу поканетите на приемот во Кремљ во декември 2016 година.
Тој веќе е на листата европски санкции поради неговот учество во борбите во Сирија каде бил началник на оперативниот штаб на „Вагнер“. Украина воведе санкции против Трошев на 26 февруари 2023 година.
Извор: 360stepeni.mk
