Путин до кинескиот претседател: Ќе разговараме за вашиот мировен план за Украина

За кинескиот план за ставање крај на војната во Украина, САД веќе изразија сомнежи дека тоа e руска тактика за застој на војната и предупредија дека војната не може да се замрзне под услови кои ѝ одговараат на Русија

За време на посетата на Москва од страна на претседателот на Кина, Си Џинпинг, рускиот претседател Владимир Путин рече дека ќе разговара за мировниот план од 12 точки на Пекинг кој се однесува на „решавањето на акутната криза во Украина“.

„Секогаш сме отворени за процес на преговори“,

му рече Путин на Си Џинпинг, додека двајца меѓусебе се нарекуваа „драг пријателе“.

Мировниот план за ставање крај на војната Пекинг го претстави минатиот месец наведувајќи дека тој вклучува престанок на непријателствата и продолжување на мировните преговори.

Но, САД веќе изразија сомнежи и предупредија дека таквиот план може да биде и „тактика на застој“.

Американскиот државен секретар Ентони Блинкен рече дека светот не треба да биде измамен со каков било тактички потег на Русија, поддржан од Кина или која било друга земја, со цел да се замрзне војната по услови кои ѝ одговараат на Москва.

Планот на Кина не предвидува децидно дека Русија мора да се повлече од Украина, на што украинската страна инсистираше досега како предуслов за какви било преговори, потсетува „Би-би-си“. Наместо тоа, во него се зборува за „почитување на суверенитетот на сите земји“ и предвидува дека сите страни мора да останат рационални и да се воздржат, како и „постепено да ја деескалираат ситуацијата“.

Во овој план на Кина се осудува и употребата на, како што се наведува, „еднострани санкции“ што во јавноста беше протолкувано како прикриена критика од кинеска страна кон западните сојузници на Украина.