ВАТИКАН (АА) – Поглаварот на Римокатоличката црква, папата Франциск, одлучи жените да имаат право на глас од следниот Свети синод (Бискупско собрание), јавува Анадолу.
Од Ватикан наведуваат дека папата одобрил некои измени на нормите што се однесуваат на управувањето со Светиот синод, еден од важните консултативни органи на Католичката црква, каде што бискупите од целиот свет повремено се состануваат поради решавање на одредени прашања.
Папата Франциск ќе им овозможи и на жените првпат да гласаат на глобалниот состанок на бискупи во октомври оваа година. Досега право на глас имаа само мажите.
Медиумите објавија дека овие промени претставуваат „историска пресвртница“ за Ватикан и „иновација без преседан во Католичката црква“.
Во Светиот синод, кој ќе се состои од приближно 370 члена, се очекува да присуствуваат вкупно 41 жена со право на глас, од кои шест црквени и 35 новоименувани.
Според ова, застапеноста на жените што имаат право на глас во следниот Свети синод, закажан за октомври, ќе изнесува околу 10 %.
„Ова е важна промена, но не и револуција“, рече кардиналот Жан-Клод Холериш.
Во минатото на жените им беше дозволено да присуствуваат на Синодот како ревизори, но без право на глас.
Извор: www.aa.com.tr
