По 12 години малата Ангела конечно го доби документот со кој е заведена во матичната евиденција. Иако родена во 2012 година во Скопје, таа дури сега се стекна со извод на родени откако нејзината баба Ѓулизар Сулејман по долго талкање по институционалните ходници не успеала да и извади документ. Таа заедно со Центарот за деца покренала случај кај Народниот правобранител за конечно да се реши овој проблем. Поради тоа што немало документи девојчето и не било запишано во училиште, само посетувало настава во Дневниот центар од Центарот за социјални случаи.
-Многу ми беше тешко, плачев за да учи школо, плачев, но од градоначалникот сопругата го носела таму во школо и го запиша без извод. А сега кај нив учи, јаде, пие, топло е внатре во Центарот, му дадоа алишта, многу сум благодарна, изјави Ѓулизар Сулејман, баба на Ангела.
Народниот правобранител Насер Зибери вели дека во текот на постапката за девојчево постојано се барале документи кои бабата воопшто не знаела од која институција да ги побара, но подоцна се покажало дека сите тие документи воопшто и не требале. Со таков проблем се соочиле и од кај Народниот правобранител.
-Според информациите кои ги добив од вработените кои работеа на овој предмет и тие се соочиле со низа небулози при негово решавање. На пример им било посочено дека странката треба да побара и достави еден куп пропратни документи за да на крај излезе дека било потребно само да се обезбеди податок од Клиниката за гинекологија и акушерство каде што детето е родено, изјави Насер Зибери, Народен правобранител.
Од Дневниот центар за деца велат дека во целата постапка за девојчето да не се води повеќе како „фантом“ најголема помош добиле токму од Народниот правобранител.
-Исконтактиравме со Народниот правобранител ни се најдоа како поддршка, помош, за да може девојчето да добие конечно документ поради кое претходно беше фантом. Значи после цели 12 години конечно девојчето има извод, изјави Мери Мадестанов Фејзулаху, дневен центар за деца.
Во центрите за социјална работа евидентирани се 700 лица кои се без документи. Од нив над 400 лица се поттикнати да се пријават за да побараат документи но за повеќе од половината од нив воопшто не е покрената постапка.
ИЗВОР: ТВ 21
