Железничкиот сообраќај во државава од попладнево се нормализира целосно откако по делумниот бојкот во кој стапи вчера дел од машинскиот и извршен персонал денеска е заокружена исплатата на ноемвриската плата и се работи на реализирање на останатите барања.
– Денес остваривме средба со државниот секретар во Министерството за транспорт, Стефан Волкановски во врска со делумниот бојкот на поголемиот дел од машинскиот и извршниот персонал во МЖ Транспорт. На средбата отворено разговаравме за проблемот и ја известуваме јавноста дека истиот е надминат, исплатен е вториот дел од платата за месец ноември 2025 година и се работи активно на реализирања на останатите барања на Синдикатот, изјави за МИА Тони Димовски, претседател на Синдикалната организација на машиновозачи на Македонија и претставник на машински и извршен персонал во МЖ Транспорт.
МЖ Транспорт, дополнува Димовски, продолжува со непречена тековна работа и останува во тесна координација со државните институции за надминување на предзвиците со кои се соочува претпријатието.
Првите возови што ќе стартуваат попладне по прекинот на делумниот бојкот се на релациите Скопје – Гвегелија во 16:55 часот и Скопје – Куманово во 16:57 минути.
Во тек на бојкотот што почна вчера во 04.47 часот сообраќаа поголемиот дел од товарните возови.
Првиот дел од плататата за ноември е исплатен на 18-ти минатиот месец, а со денешната исплата се заокружува ноемвриската плата, додека продолжува координацијата за реализација на барањата на синдикатот за исплата на прекувремени часови, бонус плата за над 150 прекувремени часови, покачување на коефициентот за 0.80 поради зголемени животни трошоци, исплата на додаток од 10 отсто на платата за вонредно повикување на работа.
Извор: kurir.mk
