Средба на претставниците на студентите во блокада и челните луѓе на Универзитетот во Белград е планирана за утре и тоа ќе биде трет нивни состанок , јавија белградските медиуми. Се очекува студентите да го објават својот став за претходната иницијатива за спас на Универзитетот во Белград, на која Ректорскиот колегиум и деканите предлагаат излез од кризата.
Во таа иницијатива, Ректорскиот колегиум предлага заедничко дејствување на студентите, наставниот и ненаставниот кадар од сите факултети на Универзитетот во Белград.
Во правна смисла, факултетите го штитат статусот на студентот со тоа што им дозволуваат на сите студенти кои проценуваат дека во моментов не се во можност да ја завршат учебната година да бидат во мирување за тековната учебна година, земајќи ги предвид индивидуалните околности на секоја институција.
Во предложената иницијатива, факултетите се обврзуваат дека, во рамките гарантирани од автономијата на универзитетот, ќе продолжат да бидат безбедно засолниште за сите свои студенти, како и дека, во договор со студентите, ќе се одржуваат мерки што гарантираат заштита на нивната безбедност.
Ректорскиот колегиум, исто така, предложи насоки за понатамошни протести и блокади, а првиот е комбиниран модел што вклучува блокади со делумно враќање на наставата, така што најмалку два часа на ден ќе бидат посветени на одржување пленуми и мезопленуми, со заеднички протести најмалку еднаш неделно или со еден ден пленуми и блокади или онлајн часови со дневни пленуми и блокади.
Ќе има преговори за поместување на крајот на учебната година на 31 октомври.
Извор: kurir.mk
