ВАШИНГТОН (АА) – Претставникот на американскиот претседател Доналд Трамп за Блискиот Исток, Стив Виткоф, денес изјави дека обновата на Појасот Газа може да трае 10-15 години, нагласувајќи го огромниот степен на уништување предизвикано од немилосрдното бомбардирање на Израел во последните 15 месеци, јавува Анадолу.
Виткоф, кој беше во посета на Блискиот Исток, го опиша разорувањето како огромно.
„Речиси не е останато ништо од Газа“, изјави тој за веб-страницата „Аксиос“. „Луѓето се движат кон север за да се вратат во своите домови и да видат што се случило, за да се свртат назад и да си заминат…нема вода и струја. Зачудувачки е колкава штета е предизвикана таму.“
Виткоф, инаку по професија инвеститор и претприемач на недвижнини, процени дека само расчистувањето на урнатините може да потрае пет години, а дополнително време е потребно за да се проценат подземните тунели пред да започне обновата.
„Постои перцепција дека можеме да дојдеме до солиден план за Газа за пет години. Но, тоа е невозможно. Ова е план за обнова кој ќе трае од 10 до 15 години“, рече тој.
Виткоф вчера пристигна во Израел каде се сретна со израелскиот премиер Бенјамин Нетанјаху, а потоа ја посети Газа.
Денес, тој се сретна со израелскиот министер за финансии, воедни и лидер на крајно десничарската партија Верски ционизам, Безалел Смотрич.
Првата шестнеделна фаза од договорот за прекин на огнот во Газа стапи на сила на 19 јануари, прекинувајќи ја геноцидната војна на Израел, во која од 7 октомври 2023 година загинаа над 47.400 Палестинци, повеќето жени и деца, од прекуграничниот напад на Хамас.
Извор: Anadolu Agency (AA)
