БЕЈРУТ (АА) – Претставник на Хамас вчера порача дека преговори за уште еден договор за размена на заложници и затвореници со Тел Авив не се можни додека израелската армија не се повлече од Појасот Газа и не се имплементира трајно примирје, пренесува Анадолу.
Халил Ал-Хаје, претставник на Хамас од Либан, за Ал Џезира изјави дека ќе го продолжат својот отпор против Израел во опколената енклава.
Тој ја нагласи потребата од сеопфатен прекин на огнот и комплетно повлекување на израелските трупи од Газа пред да се говори за прашањето за заложниците и заробениците.
Во воздушните и копнените напади на Израел врз Газа, по нападот на Хамас на 7 октомври, загинаа над 18.700 Палестинци, главно жени и деца, а уште повеќе се повредени.
Војната ја остави Газа во урнатини со половина од станбениот фонд на крајбрежната територија оштетен или уништен, а речиси 2 милиона луѓе се раселени во густо населената енклава, каде што има и недостиг на храна и чиста вода за пиење.
Од околу 240 луѓе земени како заложници од Хамас за време на офанзивата пред повеќе од два месеца, околу 130 остануваат во заробеништво откако другите беа вратени за време на привременото примирје минатиот месец.
Израелските војници застрелаа и убија уште тројца израелски заложници во северниот дел на Газа откако погрешно ги идентификуваа како закани, според портпаролот на израелската армија.
Коментирајќи го изразот „денот потоа“, кој го користат израелските кругови за да укажат на сценаријата по војната во Газа и по Хамас, Ал-Хаје рече: „Нашата победа е ‘денот потоа’ во Газа. Секој што размислува за тоа што следува по Хамас сонува, нема да се воздржуваме во одбраната на нашиот народ додека не се ослободат нашите свети места и територија“.
Тој го истакна капацитетот на групата да му се спротивставува на Израел со месеци, уверувајќи дека отпорот е во добра состојба и е решителен. „Нашиот народ никогаш нема да го подигне знамето на предавање; тој ќе остане во својата земја и ќе го поддржи отпорот“, рече тој.
Ал-Хаје нагласи дека Газа, Западниот Брег и цела Палестина се едно, а за нивното администрирање ќе одлучи само народот. „Иднината на Газа е поврзана со иднината на Ерусалим и на цела Палестина, а ние сме дел од нашиот народ.“
Тој укажа и на итната потреба од стотици камиони со помош дневно во Газа, апелирајќи до арапските и исламските земји да вршат притисок за испорака на хуманитарна помош. „Окупаторскиот Израел ја погодува Газа со два вида оружје: бомбите и гладот“, додаде тој.
Извор: www.aa.com.tr
