По шест дена од изборната кампања за претседателските избори, евроинтеграцијата и надворешната политика се дел од главните теми во излагањата на кандидатите. Оние кои се поддржани од владејачките партии ветуваат уставни измени и отворање на прегорарачките поглавја. Дел од опозициските кандидати пак, најавуваат уставни измени со одложена примена, додека пак трети порачаа дека нема да поддржат промена на уставот. Сепак, дел од експертите велат дека кандидатите за претседател не се држат до своите надлежности во надворешната политика.
„Претседателските кандидати мислам дека излегуваат многу надвор од нивните надлежности, особено во креирањето на надворешната политика и даваат ветувања кои реално не се остварливи, заради тоа што не се во нивна надлежност. Мешаат надлежности на законодавниот дом“, вели Синиша Пекевски – политолог.
Политичкиот аналитичар Пекевски оценува дека дел од ветувањата се небулозни. Па така, освен плановите што кандидатите ги имаат околу прашањето за уставните измени, тој вели дека еден шеф на држава не е во можност да раскине билатерален договор, освен ако за тоа нема поддршка во Собранието. Такво ветување досега имаше за Договорот за добрососедство со Бугарија.
„Едноставно не е возможно да се раскине тој Договор, туку можеме, доколку најдеме соодветен партнер во Бугарија во политичките партии, да се креира нов Договор, во кој ќе се изменат некои ставки и членови, кои ќе бидат подобри и за двете страни, заради тоа што треба да се градат добрососедски односи“, додава Пекевски.
Според Пекевски, сепак, претседателот е влијателен во креирањето на надворешната политика и се вреднува неговиот глас. Тој вели дека оваа политичка фигура има значаен придонес за креирањето на сликата за Македонија во светот.
Лука Андреев
Извор: alsat.mk
