Вчерашната изјава на премиерот, Христијан Мицкоски дека Законот за соодветна и правична застапеност најпрво ќе помине во Влада, а потоа ќе биде испратен во Венецијанската комисија за мислење пред да се усвои во Собранието, ја вознемири Алијансата за Албанците на Таравари.
Оттаму велат дека „обидот законот да оди на меѓународна евалуација пред усвојувањето во Собрание е опасна практика што може да создаде правен вакуум, во момент кога државата има потреба од јасни гаранции за правична застапеност на сите заедници“.
„АА настојува Законот за правична и соодветна застапеност првично да се усвои во Собрание и само после тоа да се испрати за мислење во Венецијанската комисија. Само на тој начин може да се избегнат можните задоцнувања, да се заштити граѓанската еднаквост и да се спречи политичката злоупотреба на вработувањата во администрација“, вели АА.
Биљал Касами од коалицијата ВРЕДИ гарантира дека ќе има Закон за соодветна и правична застапеност и ќе биде усвоен. Тој додаде дека од почетокот постои политички договор законот прво да оди во Венецијанската комисија, за да се избегнат проблеми како со Законот за јазиците пред Уставниот суд.
„За нас не е најважно, како што за жал беше политичка пракса во минатото, не е најважно законот да се донесе пред избори. Ветивме дека ќе има Закон за соодветна застапеност кој нема да биде оспорен од Уставот или други закони и кој ќе биде во служба на правичната застапеност, како што е предвидено со Уставот“, вели Биљал Касами.
Премиерот Христијан Мицкоски вчера соопшти дека Законот за соодветна и правична застапеност е подготвен и наскоро ќе биде усвоен на една од следните седници на Владата, по што ќе се испрати за оценка во Венецијанската комисија – како последен филтер пред да влезе во собраниска процедура.
ИЗВОР: ТВ 21
