Денес започна нова иницијатива за формирање зелена партија од здружението „Зелен Хуман Град“. Неколку активисти напладне се собраа пред канцелариите на Град Скопје со пароли во раце. Тие треба да соберат 1.000 потписи од граѓани низ целата држава за да ја регистрираат како политички субјект преку правен застапник, но велат дека нема да имаат претседател ниту хиерархија.
Марјан Калевски изјави дека ова го прават поради правен ќор-сокак во врска со кандидатирањето независни листи.
Тие објаснуваат дека ова го прават бидејќи нема друг начин за дејствување – најголемите партии од власта и опозицијата се согласија со измените во изборниот законик да го зголемат прагот на потписи за независни листи на локалните избори. Иако Уставниот суд укина два члена, сè уште нема правно решение за независните листи.
Претседателката на државата, Гордана Силјановска Давкова, изјави дека имала средба со овие здруженија кои го изразиле своето незадоволство поради пречките за кандидатура со независни листи. Таа рече дека за ова прашање постои правен вакуум бидејќи Уставниот суд ги укина членовите 17 и 18 од Изборниот законик.
Од новоформираната партија „Движење Арберија“ велат дека мора да се најде решение во законодавниот дом за да не им се ускрати правото на граѓанските движења да настапуваат со независни листи.
Овој пат може да го следат и други организации. Една од нив, „Шанса за Центар“, деновиве изјави дека сите опции се отворени. Тие велат дека ако изборниот модел остане ист, нема да имаат друга алтернатива освен да се трансформираат во партија.
Дури и претседателот на Парламентот, Гаши, истакна дека сè уште нема политички договор за изборниот модел, иако Уставниот суд веќе одлучи дека треба да се донесе нов Изборен законик, откако во март ги укина членовите со кои беше зголемен бројот на потписи што независните кандидати мораа да ги соберат.
ИЗВОР: ТВ 21
