Израел ги продолжи воздушните напади врз Либан. Според либански извори загинаа десетици лица, а исто толку се ранети. Израелските одбранбени сили соопштија пак, дека Хезболах лансирал 45 ракети врз градот Акре на северот на Израел.
Израелскиот премиер Бенјамин Нетанјаху ѝ нареди на израелската армија да продолжи со борбите против Хезболах со полна сила и го игнорираше повикот за примирје, предложено од САД, ЕУ и сојузниците.
„Нема да има примирје на северот. Израел ќе продолжи со борбите против терористичката организација Хезболах со сета моќ сѐ до победата и враќањето на раселените жители од северот во нивните домови. Борбите против Хамас и Хезболах продолжуваат до исполнувањето на сите цели.“ – Кабинет на израелскиот премиер.
САД, Европската Унија, Саудиска Арабија, Обединети Арапски Емирати, Велика Британија и Катар побараа 21-дневна пауза во борбите, што ќе овозможи натамошни преговори за да се постигне сложен договор.
„Ситуацијата меѓу Либан и Израел е неподнослива и претставува неприфатлив ризик за поширока регионална ескалација. Ги повикуваме сите страни, вклучително и владите на Израел и Либан, веднаш да поддржат привремен прекин на огнот и да дадат вистинска шанса за дипломатско решение“.
Ова доаѓа откако шефот на израелската армија Херци Халеви најави дека обемните воздушни напади против Хезболах би можеле да бидат вовед во копнена офанзива во Либан.Генералниот секретар на Обединетите нации, Антонио Гутереш, во своето обраќање на состанокот на Советот за безбедност на Обединетите нации изјави дека светот не може да си дозволи Либан да стане уште една Газа.
„Со еден јасен глас да кажеме, престанете со убивањето и уништувањето, ублажете ги реториката и заканите, отстапете од работ. По секоја цена мора да се избегне сеопфатна војна. Тоа сигурно би било сеопфатна катастрофа.“ – Антонио Гутереш генерален секретар на ОН..
Израел почна серии воздушни напади врз Либан од понеделникот и досега загинаа над 600 луѓе, а бројот на повредени е над 2.000.
Извор: 24vesti.mk
