Филмот „Утре наутро“ на Јани Бојаџи премиерно ќе биде прикажан утре (19 ноември) во скопското кино Синеплекс. Сценариото, режијата и музиката се на Бојаџи, кој е и продуцент, извршен продуцент е Дејан Милошевски, директор на фотографија е Дарио Секуловски, монтажер е Давид Дулев, сценограф е Гоце Попов, костимите се на Зорка Тодорова, а шминката на Ирена Сенокозлиовска.
Филмот е инспириран од организираниот напад на Собранието на 27 април 2017-та
„ ‘Утре наутро’ е политичка драма во кој ги опсервирам луѓето кои ги носат одлуките со чии последици се соочуваме ние. Ова е приказна инспирирана од вистински настани кои се случиле меѓу 2014 и 2017 година. Заплетот на приказната е фаталниот 27 април 2017 и се занимава со прашањето што после тоа. Зборува за две семејства кои се соочуваат со последиците на одлуките кои ги носат т. н. глави на семејствата – татковците, мажи на извесна возраст од сите нации и религии во Македонија, неподготвени да се соочат со фактот дека последиците од одлуките кои тие ги носат најесто ги сносат нивните семејства и сите други семејства. Филмот е посветен на сите оние жени во Македонија кои се подготвени да ги одбранат семејствата и заедницата на која се посветени“, вели Бојаџи.
Во главните улоги се Нина Деан и Ирена Илиевска, а играат и Гоце Андонов, Јана Никодиновска, Кети Дончевска-Илиќ, Бајрам Северџан, Горан Стојаноски, Васил Зафирчев, Роберт Вељановски, Благој Веселинов, Јана Вељановска и Димитрина Мицкоска.
Продуценти се „Синемон медија фактори“ и „Револушн продакшн“, во соработка со ТВ „Алфа“.
Кинодистрибуцијата низ Македонија ќе почне на 20 ноември и веќе се закажани проекции во Штип, Велес, Богданци, Струга и Крива Паланка.
Извор: vecer.mk
