Ѓорѓи Галетановски поднесе неотповиклива оставка од функцијата претседател на градската организација на СДСМ во Скопје, потврдија за ТВ 24 извори од партијата.
Како што дознава медиумот, оставката е поднесена од морални и лични причини и доаѓа по првиот круг од локалните избори, на кои СДСМ доживеа тежок пораз и освои само пет советнички места во Советот на Град Скопје.
ТВ 24 се обидела да добие изјава од Галетановски, но тој не одговорил на прашањата. Од партијата официјално потврдија дека оставката е доставена на „Бихаќка“.
„Оставката е поднесена од лични и морални причини и доставена до партијата. Во однос на понатамошните одлуки, органите на СДСМ ќе постапат согласно статутарните одредби, за што јавноста ќе биде навремено информирана“, изјавија за ТВ 24 од партијата на Венко Филипче.
Галетановски, кој е дел од советничката група на СДСМ во Град Скопје, во минатото беше директор на Зоолошката градина за време на мандатот на Петре Шилегов. Според информации од партиски извори, тој важи и за критичар на одредени политики на актуелното раководство на СДСМ.
