Според италијанскиот дипломат и експерт за безбедносни прашања, ЕУ не смее да остави важни земји бескрајно да чекаат, а земјите кандидати кои се способни да си ја завршат домашната задача треба да можат да станат членки на ЕУ во разумно време. Затоа, порачува тој, од вас зависи дали ќе бидете подготвени за тоа што е можно поскоро
По војната во Украина, Европската Унија (ЕУ) нема друга опција освен да се прошири, а Северна Македонија треба да ги заскупа ракавите за нејзината европска перспектива, се дел од пораките кои во интервју за државната агенција МИА ги испраќа италијанскиот експерт за глобални безбедносни прашања Стефано Стефанини.
Стефанини е и со богато дипломатско искуство – тој е поранешен постојан претставник во НАТО и некогашен дипломатски советник на италијанскиот претседател Џорџо Наполитано, а служел и во дипломатските мисии во Њујорк, во ОН, Москва, Вашингтон и Перт.
„Пораката којашто ЕУ-членките ја праќаа од 2013 година, по зачленувањето на Хрватска е „почекајте, почекајте“, сега пораката треба да биде „движете се побрзо и ќе станете дел од ЕУ.“ По војната во Украина, ЕУ сега нема друга опција освен да се прошири, што ќе бара прилагодување од нејзина страна, бидејќи не смее да остави важни земји бескрајно да чекаат, а земјите кандидати кои се способни да си ја завршат домашната задача, како Северна Македонија, треба да можат да станат членки на ЕУ во разумно време. Од вас зависи дали ќе бидете подготвени за тоа што е можно поскоро“
вели Стефанини.
На прашањето што треба земјава да направи во овој круцијален момент за нејзината европска перспектива, италијанскиот дипломат вели дека треба да се постигне политички консензус и да се посвети на реформите од ЕУ-агендата.
„Северна Македонија треба да ги засука ракавите и да работи на пристап што ги вклучува сите партии бидејќи влезот во ЕУ бара консензус од сите луѓе и од сите политички сили. Реформите понекогаш се болни и треба да ја имате целата земја зад себе. Тоа е она што Северна Македонија треба да го направи, а ЕУ мора да биде јасна дека ако Северна Македонија до 2028, 2029 или која било година, ги исполни условите за членство може да влезе во Унијата. Зачленувањето мора да оди според принципот на регата, што значи дека ако ја поминете линијата, нема потреба да чекате некого“,
вели Стефанини.
ИЗВОР: 360stepeni.mk
