Од Центарот за управување со кризи велат дека ова е второ излевање на водата од Вардар во време од еден месец во овој предел. Според ЦУК нивото на водата на реката Вардар во моментот е до максималната кота во коритото
Куќи и ниви во населените места Раотинце, Копанце и Туденце во Општина Јегуновце се поплавени откако реката Вардар поради зголемен водостој се излеа во овој дел.
Од Центарот за управување со кризи велат дека состојбата во овие населени места, на единствениот број за итни ситуации 112 во ЦУК, ја пријавил претседателот на месна заедница од село Раотинце.
„Водата од реката се прелеала на критичните места кај Копанце и преку месноста ‘Старо Вардариште’ дошла во атарот на село Раотинце. Ова е второ излевање на водата од Вардар во време од еден месец во овој предел. Инаку, нивото на водата на Вардар во моментот е до максималната кота во коритото“,
се вели во соопштението на ЦУК.
Дека излевањето на Вардар предизвикало поплави во овој дел од општината Јегуновце потвдрува и градоначалникот Димитар Костадиноски.
Денеска од ЦУК предупредија дека реката Вардар има зголемен водостој и поради тоа најавија дека ќе биде сопрен целосно истекот од ХЕЦ „Вруток“.
Зголемен водостој, според информациите од ЦУК, се очекува Вардар да има и низводно од Скопје кон Орешани, Зелениково, Таор и Велес.
Исто така, според ЦУК, и нивото на реката Треска сè уште е високо, додека на останатите водотеци има намалување или стагнација на водостоите во однос на утринските.
ИЗВОР: 360stepeni.mk
