Се проширува истрагата за трагедијата која се случи во дискотаката Пулс во Кочани. Полицијата извриши проверки во кафе барот Класик во сопственост на Дејан Јованов, во чија сопственост е и објектот во кој избувна пожарот на 16 март, каде животот го загубија 59 млади лица, а околу 200 лица беа повредени.
Од МВР велат дека е претресен и неговиот автомобил „Инсигниа“ како и биле на распит и членови на семејството на Јованов, кој е осомничен дека нелегално управувал со објектот. Исто така е извршен претрес и одземени се работи од канцелариите на ДПИ Кочани.
„Во домот на Д.Ј. пронајдени и одземени се лап топ компјутери, повеќе мобилни уреди, документација и други предмети. Одредени предмети се одземени и од возилото и од угостителските објекти, а пронајдена и одземена е и финансиска документација. Во ДПИ- Канцеларија Кочани пронајден и одземен е еден компјутер, еден лап топ компјутер и еден таблет, како и целокупната документација поврзана со правни субјекти во сопственост на Д.Ј.“, вели МВР.
Според експертите за безбедност одговорноста треба да почне да се бара од денот кога избувна пожарот. Екс началникот на СВР Скопје, кој сега е во пензија, Љубомир Ѓурќевски, прашан како ги оценува настаните и истрагата за трагедијата, повика да нема селективен прогон, додека исто така побара да се отворат повторно истрагите и за другите трагедии каде имаше голем број на жртви во последните четири години.
Инаку ОЈ Кочани и ЈО за гонење на организиран криминал и корупција сомничат вкупно 34 лица и три компании, за кривично дело за тешки дела против јавната безбедност. Во притвор се 24 лица.
ИЗВОР: ТВ 21
