Во сабота во 10 часот ќе почне погребот на папата Франциск. Десетици кардинали од целиот свет итно се сретна во Рим каде беа договорени деталите за последното испраќање на поглаварот на римокатоличката црква.
Погребната миса ќе се одржи на отворено. Службата ќе ја води деканот на Колеџот за кардинали, Џовани Батиста Ре, а ќе сослужуваат патријарси, кардинали, архиепископи, бискупи и свештеници од целиот свет. На олтарот на исповедта, кардиналот камерленго ќе претседава со Литургијата на Словото, по што ќе почнат посетите за оддавање почит на починатиот понтиф.
Своето присуство на погребот веќе го потврдија американскиот и францускиот претседател, шефицата на Европската Комисја како и претседателите на Аргентина и Бразил. Италија пак прогласи петдневна жалост. А во тестаментот кој го остави, папата Франциск побарал да биде погребан во базиликата Санта Марија Маџоре во Рим, а не во базиликата Свети Петар во Ватикан, каде што е последното почивалиште на многу негови претходници.
Додека траат подготовките за последното испраќање на папата Франциско, веќе се истакнуваат кандидатите за нов папа, секој со различен пристап и визии за иднината на Црквата..Меѓу главните кандидати е 70 годишниот Кардинал Пјетро Паролин од Италија кој е официјален ватикански дипломат и државен секретар на Светата Столица. Големи се шансите и на кардинали кои доаѓаат од Африка и Азија.
„Двајца посебно се истакнуваат, кардиналот Туксон од Гана, Африка и кардиналот Тагле од Филипини кого папата Франциско го повика во Ватикан каде извршува важна функција. Сметам дека е прерано Африка да добие папа…Филипини се стара католичка држава , голема и важна. Покрај тоа, кардиналот Тагле има и кинески корени и со тоа мислам дека Азија ќе добие на важност.“ – Фрањо Топиќ теолог.
Изборот на новиот папа вообичаено се одржува 15 до 20 дена по смртта на претходникот, а учествуваат 135 кардинали од целиот свет. Во тајно гласање, кое може да трае со денови, нов поглавар на Римокатоличката црква ќе биде оној кој ќе успее да ја добие поддршката на 90 кардинали. Кога папата е изгласан, се палат гласачките ливчиња и се пушта бел чад од Систинската капела, за на светот да му се открие дека е избран нов папа.
Роден како Хорхе Марио Бергољо во 1936, папата Франциск стана поглавар на Римокатоличката црква во 2013-тата година. Како духовен водач на 1,4 милијарди католици во светот, папата Франциск беше првиот папа од Латинска Америка, првиот језуит и првиот што го доби името по Свети Франциск од Асизи, средновековен монах.
Извор: 24vesti.mk
