Министерството за образование и наука известува дека е изготвен нов предлог Закон за учебници во основното и средното образование, кој е поставен на владиниот ЕНЕР-систем (Електронски национален регистер на прописи). Со неговото донесување, актуелниот закон од 2008 година ќе биде заменет.
- Сите заинтересирани граѓани можат да придонесат за усвојувањето на најдобрата верзија која ќе биде испратена во собраниска процедура. Во предлог-законот се вклучени сугестиите од издавачките куќи во Македонија, со чии претставници раководството на МОН и Педагошката служба имаше конструктивна работна средба, соопштија од МОН.
Од Министерството додаваат дека новиот закон треба да осигура изработка на учебници со поквалитетна содржина, да ја намали веројатноста за грешки какви што имаше во минатото и да ја поедностави постапката за набавка, со цел учебниците да бидат навремено испорачани во училиштата.
ИЗВОР: ТВ 21
