Селективно дејствување врз етничка основа за случувањата на 28 ноември, негарантирање еднаквост и безбедност за сите граѓани, неспособност за праведност и реторика која ја продлабочува етничката поделба, се само некои од причините за интерпелацијата против министерот за внатрешни работи Панче Тошковски што ја поднесе коалицијата „Европски фронт“.
Како што рече вечерва пратеникот Елми Езири, образложувајќи ја интерпелацијата во Собранието, Тошковски не ги исполнува своите обврски и затоа треба да понесе одговорност.
Според Езири, откако Тошковски е министер за внатрешни работи, МВР е претворено во ВМРО, а кај Албанците се намалува довербата во оваа институција.
– МВР е најбитното Министерство, неопходно за ред, стабилност и функционалност на државата, но за нас со декади е институција во која Албанците не се третирани на еднаков начин. Критериум е етничката припадност, а вие не дадовте најдобар пример граѓаните да ја сменат таа перцепција за Министерството. Денес МВР за помалку од седум месеци се претвори во МВР-ВМРО, земјава се претвори во полициска држава која им се заканува на граѓаните, ги заплашува конкретно Албанците да не креваат глас. Ова не може да се толерира, истакна Езири.
Тој оцени и дека Тошковски го почнал својот мандат со мега скандал. – Ги апсевте младите Албанци, а продолживте со изнесување неосновани обвиненија кон новинарот Фуркан Салиу кој потоа ја докажа својата невиност. МВР исто како и пред 2017 година, стана главен предизвикувач на институционална дискриминација. И покрај изјавите дека ќе биде раководено од Албанец, тоа не се случи и се продолжи по старо. Недовербата во МВР кај Албанците се зголемува, нивните функции во полицијата се деградирани, замениците директори се таму само кукли, а видовме и како ги делгитимиравте во ноември, рече пратеникот.
Тошковски во одговорот рече дека интерпелацијата е обид за манипулација и дефокус на македонската јавност.
– Во образложението не кажавте апсолутно ништо, а додека зборувавте не Ве слушнав ниту еднаш освен Албанците, да ги спомнете и Турците, Ромите, Власите, Србите, Бошњаците,…. и сега Вие ќе зборувате за селективен пристап и несоодветен третман на етничките заедници? Инаку, не се апсат Албанци, Македонци, Турци, Власи, туку се апсат криминалци и ќе се апсат. Сите кои душмански го краделе народот ќе се апсат, но не со циркузи како во ваше време, туку културно, му порача Тошковски на Езири.
Според министерот, не е точно тврдењето на Езири дека е намалена довербата на Албанците во МВР.
– Велите, Албанците немаат доверба во МВР. Лажете дека е намалена довербата, зголемена е, истакна Тошковски.
ИЗВОР: kurir.mk
