Модниот фотограф Оливиеро Тоскани, кој се прослави со своите шокантни рекламни кампањи за „Бенетон“, почина на 82 години, објави неговото семејство. Поранешниот уметнички директор на „Бенетон“ минатата година објави дека боледува од амилоидоза, ретка неизлечива состојба која ги напаѓа виталните органи и нерви. Тој бил примен во болница во сериозна состојба во петокот.
Неговата работа го привлекуваше вниманието кон општествени теми, како епидемијата на сида, расизам, војна и смртна казна.
Роден во Милано во 1942, Тоскани беше син на фотограф на „Кориере дела сера“ и во текот на кариерата работеше за најпрестижните модни магазини, како „Вог“ и „Џи-Кју“, при што помогна да се лансира манекенската кариера на Моника Белучи. Фотографираше икони на културата како Енди Ворхол, Џон Ленон и Федерико Фелини.
Тоскани кажа дека неговите кампањи имале за цел да ја зголемат свеста за одредени теми (Фото: Гети)
Сепак, со светска слава се стекна како директор во „Бенетон“, функција на која остана 18 години. Користеше модели од сите раси и го популаризирашелогото „Обединети бои на Бенетон“, а неговите провокативни фотографии предизвикуваа контроверзи. Една од нив содржеше крвава облека на војник кој загинал во БиХ, а на друга беше прикажан Дејвид Кирби, маж кој умирал од сида, поради што имаше повици за бојкот на „Бенетон“.
Тоскани се повлече од компанијата во 2000 по спорот околу неговата последна кампања, која вклучи фотографија на затвореници осудени на смрт.
„Моите кампањи имаа за цел да ја зголемат свеста за одредени теми, како човекови права, религија и расизам. Ја искористував облеката за да покренам социјални прашања“, кажа Тоскани своевремено.
Тој се врати во „Бенетон“ во 2017, но три години подоцна пак ја раскинаа соработката.
ИЗВОР: sdk.mk
