По почетниот извонреден успех на „Злобница 2“ (Wicked: For Good’s), продукциската куќа „Јуниверзал пикчрс“ (Universal Pictures), се чини, е подготвена за повеќе приказни од „Земјата на Оз“. Имено, Мајкл Мозес – маркетинг-директор на студиото, изјави за „Валчр“ (Vulture) дека „нештата се во тек“, прашан за продолжување на серијалот филмови.
– Поради успехот на „Злобница“, но и обожавателите, имаме јасна одговорност да откриеме како можеме да продолжиме во овој универзум… Дали веќе сме сфатиле како тоа? Не. Но, има некои работи што се во тек, рече Мозес.
И претходно, Стивен Шварц, кој ги напиша и компонираше сите песни од „Злобница“ за мјузиклот во два дела, изјави за „Енклер“ (The Ankler) дека веќе има идеја за нов проект со светот од „Злобница“.
– Мислам дека приказната за Глинда и Елфаба се чини комплетна – но, постојат и други аспекти што би можеле да се истражат, рече Шварц.
Филмовите „Злобница“ се засновани на романот на Грегори Мегваер од 1995 година – „Злобница: Животот и времето на злобната вештерка од Западот“. Според Шварц, Магваер напишал осум продолженија на романите, така што не недостасува материјал од којшто може да се извлече нов филм. Најновиот роман на Мегваер беше објавен оваа година, како приказна за раната младост на Елфаба, со наслов „Елфи: Злобно детство“. Следи и приказна за Глинда, под наслов „Глинда: Волшебно детство“, најавена за во 2026 година.
„Злобница 2“ постави нов рекорд за филмска адаптација на бродвејски мјузикл – со 147 милиони долари на американските киноблагајни и 223 милиони долари низ целиот свет во првиот викенд од киноприкажувањата. Тоа значи, за разлика од првиот дел, вториот филм, речиси сигурно ќе ја надмине границата од милијарда долари заработка. Студиото потроши околу 550 милиони долари за продукција и пласман на двата филма.
Извор: vecer.mk
