ИЗМИР (АА) – Норвешкиот премиер Јонас Гар Сторе денес изјави дека смртоносните лавини во Тромс се трагичен почеток на Велигден и ги повика луѓето да ги следат советите на надлежните, пренесува Анадолу.
„Ова е трагичен почеток на Велигден. Моите мисли се со роднините на оние што загинаа и со преживеаните по неколкуте тешки лавини во неколку општини во округот Тромс. Лавините однесоа и животни и објекти во морето. Ситуацијата е сериозна и сè уште нејасна“, рече Сторе во изјавата за Норвешката новинска агенција.
Тој, исто така, им се заблагодари на локалните власти, на хуманитарните тимови и на волонтерите за „непроценливиот напор во спасувачката работа“.
Најмалку четири лица ги загубија животите вчера во лавини во Северна Норвешка.
Откако беше јавено за смртни случаи во Тромс, полицијата, норвешката Дирекција за водни ресурси и енергија (НВЕ) и главниот медицински службеник ги предупредија луѓето да не остануваат на планините бидејќи утрово се случија уште две лавини во регионот.
Портпаролот на Националниот центар за спасување, Фроде Иверсен, претходно изјави: „Постои голема опасност од лавини во цела Северна Норвешка.“
„Ова се тешки, смртоносни лавини. Лавини на места каде што немало лавини можеби и сто години. Ова ни кажува дека ситуацијата со лавините е опасна по живот“, изјави главниот лекар во Универзитетската болница во Северна Норвешка, Мадс Гилберт, предупредувајќи да не се оди на врвовите по стрмен терен.
Ема Џулсет Барфод, водач на групата за предупредување од лавини, рече дека низ Северна Норвешка владеат многу нестабилни услови.
Нивото на опасност сега е 4, на скала од 5. Ситуацијата е толку сериозна што размислувавме да објавиме ниво 5, но во тој случај зборуваме за анормално многу и екстремно големи лавини, рече Барфод.
Извор: www.aa.com.tr
