Партиски кандидати, наместо компетентни лица – граѓанскиот сектор до пратениците: Добро внимавајте како гласате!

Во изборот на кандидатите за Комисијата за спречување и заштита од дискриминација, пратениците не го почитувале законот, обвинува граѓансиот сектор. Токму поради тоа, Мрежата за заштита од дискриминација ќе поднесе претставка до Уставниот суд. Како што велат, не бараат свои претставници во оваа комисија, или политичарите да им направат услуга и да ги изберат нив, туку напротив, велат за сите позиции во комисијата да се избере кандидат според закон. Воедно додаваат дека за вакво нешто, политичка волја во собранието нема.

-Одлуката да ми го дадат најкраткиот мандат во Комисијата за спречување и заштита од дискриминација е понижувачка, не само кон мене, туку и кон целиот граѓански сектор и експертите што со години се занимаваат со ова прашање…Со тоа што јавно кажувам дека нема да го прифатам најкраткиот мандат, сметам дека кон мене исто така е сторена политичка дискриминација, бидејќи не сум поврзана со политичка партија, додека на другите кандидати кои се поврзани со политички партии им се дадени подолги мандати-вели Драгана Дрндаровска од Платформа за родова еднаквост.

Уранија Пировска, извршна директорка на Хелсиншкиот комитет, не сакајќи да ги коментира имињата на кандидатите, изјави дека во законот стриктно се наведени критериумите според кои се бираат кандидатите. Законот вели, седум години работно искуство од областа на човековите права од кои 5 години во областа дискриминација.

-Јас уште еднаш упатувам апел, пратениците добро да размислат пред да гласаат бидејќи не може да се очекува луѓе кои што ќе бидат избрани, а се избрани заради нивната партиска поврзаност да бидат непристрасни, фукцијата да ја извршуваат професионално и отчетно кон граѓаните-вели Уранија Пировска.

За време на претставувањето на кандидатите во Собранието, се добил впечаток дека голем број од кандидатите, мислат дека само поради тоа што се правници, по дифолт го исполнуваат условот.

„Укажуваме дека треба да се размисли, каде е ова тело, односно како суштински ќе се придонесе кон борбата против дискриминацијата затоа што повеќе од 10-тина години работиме на јакнење на Комисијата и сметаме дека досега веќе имаме некаков успех во тоа, а со дел од предложените кандидати неизвесно е дали ова тело суштински ќе придонесе во борбата потив дискриминацијата.“, вели Александра Цветановска, од Македонско здружение на млади правници.

За нови членови на КСЗД со петгодишен мандат од членовите на Кoмисијата за именувања и избори добија кандидатите Флора Кадриу, доктор по политички науки, Душан Томшиќ, дипломиран социјален работник од Скопје и Зекир Абдулов, дипломиран правник од Делчево. Драгана Дрндаревска, дипломиран правник од Скопје доби поддршка од членовите на Комисијата за мандат од 1 година 2 месеци и осум дена. Сите кандидати кои го поминаа комисискиот филтер, треба да се најдат на гласање на пленарна седница на Сoбранието.