ХЕЛСИНКИ (АА) – Во Финска денес се одржуваат парламентарни избори на кои повеќе од три милиони Финци со право на глас ќе можат да изберат 200 пратеници во финскиот Парламент, јавува Анадолу.
Над 2.400 кандидати од 22 партии се борат за 200 места во Парламентот.
Околу 40 отсто од гласачите со право на глас гласале однапред.
Се очекува трите партии да бидат во тесна трка, а социјалдемократите на премиерката Сана Марин се борат за втор мандат на чело на Владата.
Надежите на финската премиерка Сана Марин за обезбедување втор мандат се доведени во прашање поради порастот на поддршката за екстремно десничарските партии и опозициската конзервативна Национална коалициска партија, која има тесно водство пред неделните парламентарни избори, наведено е во анкетата на јавното мислење.
Марин дојде на власт во декември 2019 година со Социјалдемократската партија (СДП), но анкетите покажуваат дека е на второ место со помалку од 19 отсто во последната предизборна анкета.
Триесет и седумгодишната премиерка ја водеше својата нација низ пандемијата на КОВИД-19, заслужувајќи пофалби дома и на меѓународно ниво.
Неодамнешните анкети покажаа дека секоја од трите партии би можела да освои околу 20 отсто од гласовите. Ако се случи тоа, ниту една партија не би била во позиција сама да формира Влада.
Се очекува во следните неколку дена да започнат разговорите за формирање владејачка коалиција.
Извор: www.aa.com.tr
