ГАЗА (АА) – Палестинските деца во блокираниот Појас Газа ја повикаа меѓународната заедница да им обезбеди исти права на живот како и на другите деца во светот, јавува Анадолу.
Палестински деца учествуваа на митинг пред седиштето на Детскиот фонд на Обединетите нации (УНИЦЕФ) во Газа на покана на Мрежата за заштита на децата.
Децата ги бараа своите основни права што се прекршуваат за време на 17-годишната израелска опсада.
Насобраните деца носеа транспаренти со натписи „Имаме право да живееме како другите деца во светот“ и „На гладните деца во Газа им се одземени најосновните човекови права“.
Палестинските деца, исто така, пренесоа порака до администрацијата на УНИЦЕФ за потребата од заштита на правата на децата во Газа.
Девојчето Јара ез-Зехарин повика да се заштитат правата на децата и на другите жители на Газа.
Таа побара меѓународната заедница да изврши притисок врз Израел да ги ослободи децата притворени во израелските затвори.
„Ние децата се чувствуваме како да сме во голем затвор во Газа. Ни се одзема правото на безбеден живот, слобода на движење и патување“, вели ова мало девојче.
Девојчето Мера Мустех прати повик до сите земји да им помогнат.
„Спасете нѐ од војните и конфликтите во кои постојано живееме. Сакаме да живееме далеку од војна и конфликти, како и другите деца во светот“, рече таа.
Според податоците на Унијата на затвореници на Палестинската ослободителна организација (ПЛО), во израелските затвори во моментов има околу 5.200 палестински затвореници, меѓу кои 38 жени и 170 деца.
