Овој јули веројатно ќе биде најтопол во историјата

Би-би-си пишува дека некои научници веруваат оти јули 2023 би можел да биде дури и најтоплиот месец во изминатите 120 000 години

Јули 2023 година веројатно ќе биде најтоплиот јули во историјата. Според научниците, во услови на големи топлотни бранови, практично е извесно дека ќе биде најтоплиот месец, со највисоки температури досега забележани некаде во светот.

Анализа на Универзитетот во Лајциг покажува дека месецов ќе бидат урнати топлински рекорди бидејќи се предвидува дека глобалната просечна температура за овој месец ќе биде околу 1,5 Целзиусов степен над прединдустриските нивоа.

И според податоците на ЕУ, овој јули ќе биде најмалку 0,2 степени Целзиусови потопол од јули 2019 година, што беше најтопол во изминатите 174 години.

„Разликата помеѓу оваа година и јули 2019 година е толку значителна што веќе можеме со апсолутна сигурност да кажеме дека ова ќе биде најтоплиот јули“,

изјави климатологот од Лајпциг, Карстен Хаустејн.

Би-би-си пишува дека некои научници веруваат оти јули 2023 би можел да биде дури и најтоплиот месец во изминатите 120 000 години.

Светската метеоролошка организација на ОН (СМО) исто така соопшти дека е „исклучително веројатно“ да достигне рекорд, но оти нема отворено да зборува за тоа додека не бидат достапни сите конечни податоци.

Новиот шеф на агенцијата на ОН за наука за климата, Џим Скија изјави дека светот ќе ја надмине целта од Парискиот договор за загревање од 1,5 степени Целзиусови над прединдустриските нивоа, и истакна дека политиките на земјите не се доволно амбициозни.