Отворена границата со Египет, се евакуираат странци и тешко повредени од Газа

Договорот им дозволува на имателите на странски пасоши и на некои критично повредени лица да излезат од граничниот премин Рафах меѓу Египет и Газа, иако нема временска рамка колку долго ќе остане отворен за евакуација, додал изворот на Ројтерс

Катар во соработка со САД посредуваше во постигнувањето договор меѓу Египет, Израел и Хамас за да им се дозволи на странските сопственици на пасоши и на некои тешко повредени лица да ја напуштат опколената Газа, изјави денеска за Ројтерс извор запознаен со договорот.

Договорот им дозволува на имателите на странски пасоши и на некои критично повредени лица да излезат од граничниот премин Рафах меѓу Египет и Газа, иако нема временска рамка колку долго ќе остане отворен за евакуација, додал изворот.

„Договорот не е поврзан со други прашања за кои се преговара, како што се заложниците држени од Хамас, палестинската исламистичка група која владее со Газа или паузите осмислени за да ја олеснат хуманитарната криза во енклавата која страда од недостиг на храна, вода, гориво и лекови“,

рекол изворот на Ројтерс.

Хамас соопшти дека наскоро ќе ослободи некои странски заложници

Израел ги испрати своите сили во Газа по неколкунеделно воздушно бомбардирање како одмазда за големиот напад на Хамас на 7 октомври.

Хамас им кажа на посредниците дека наскоро ќе ослободи некои од околу 200-те странски затвореници што ги киднапираше за време на нападот врз Израел, изјави Абу Убаида, портпарол на вооруженото крило на групата Бригади Ал-Касам во видео објавено вчера на апликацијата Телеграм.

Тој не кажа колку затвореници се притворени или каква националност се.

Египет подготви теренска болница во Шеик Зувејд во Синај, информираат медицински извори. Вчера во Рафа беа испратени десет амбулантни возила.

Израел ја опколи Газа по нападот на Хамас, а ОН и други претставници на хуманитарната помош рекоа дека цивилите во енклавата живеат во јавно-здравствена катастрофа при што болниците се борат да ги одржат во живот повредените додека продолжуваат прекините на струја.

Во средата, комуникациите и интернет услугите повторно беа целосно прекинати во енклавата, соопшти „Палтел“, најголемиот телекомуникациски провајдер во Газа.