АНКАРА (АА) – Најмалку осум Палестинци се убиени денес во израелските воздушни напади во текот на ноќта врз домови во централниот дел на Појасот Газа, додека израелскиот смртоносен напад навлегува во 278-миот ден, објавија локалните медиуми, пренесува Анадолу.
Палестинската официјална новинска агенција „Вафа“ соопшти дека осум Палестинци, меѓу кои шест деца, се убиени, а десетици други се повредени во израелските воздушни напади врз домовите во бегалскиот камп Нусејрат.
Други израелски гранатирања беа пријавени во различни области на Појасот Газа, вклучително и израелски напад на улицата Насер во северниот дел на градот Газа, во кој беа повредени околу 10 лица.
Израелската Армија уништи повеќе згради во областа Муграга во северниот дел на бегалскиот камп Нусејрат.
Израелската тешка артилерија, исто така, продолжи да го напаѓа саудискиот кварт во западниот град Рафа, во најјужниот дел од Појасот Газа, додава палестинската агенција.
Прекршувајќи ја резолуцијата на Советот за безбедност на Обединетите нации со која се бара итен прекин на огнот, Израел се соочи со меѓународна осуда поради неговата континуирана брутална офанзива со неселективно бомбардирање на цивилните населби, училишта, верски објекти и болници на Појасот Газа на 7 октомври минатата година.
Според локалните здравствени власти, оттогаш во израелските напади се убиени повеќе од 38.200 Палестинци, главно жени и деца.
И покрај тоа, израелските напади врз Појасот Газа продолжуваат со несмален интензитет, а испораката на хуманитарната помош не е доволна за решавање на хуманитарната катастрофа.
Извор: Anadolu Agency (AA)
