Градоначалникот на Аеродром Тимчо Муцунски соопшти дека деновиве отпочнуваат активностите на локацијата „Островска“ во Лисиче, а граѓаните од овој дел на Аеродром после долги години добиваат нова капитална инвестиција од буџетот на општината.
-Со градежните активности, на оваа локација, започнува изградбата на современ спортски терен за фудбал и кошарка, детско игралиште, поставување на павер елементи, клупи, осветлување и нови садници во целиот простор. Реализацијата на овој спортско-рекреативен комплекс кој ќе стане ново место кое ќе ги сплотува и обединува лисичани, е дел од поголема пролетна градежна офанзива која се реализира во овој дел од Аеродром. Во рамките на акцијата, во употреба е пуштено ново детско катче во градинката „Лавче“, а наскоро почнува и надградбата на основното училиште „Гоце Делчев“, соопшти Муцунски.
-Ветивме дека проектите и инвестициите ќе се однесуваат на сите делови од Аеродром, а токму затоа задоволство е кога ќе се види дека овие ветувања се реализираат. Населбите кои со години важеа за заборавени добиваат содржини кои го унапредуваат урбаното живеење и секојдневието на граѓаните, потенцира првиот човек на општина Аеродром.
ИЗВОР: skopjeinfo.mk
