На истиот лет, излеговме во пресрет и на нашите пријатели, обезбедувајќи трансфер и на седум албански, седум црногорски и три бугарски државјани, информира Османи
Со денешниот чартер-лет од Тел Авив, кој беше организиран и платен од страна на Владата на Република Северна Македонија, ги донесовме и преостанатите 67 наши државјани кои побараа асистенција за нивна евакуација од Израел, информира министерот за надворешни работи Бујар Османи на својот фејсбук-профил.
„На истиот лет, излеговме во пресрет и на нашите пријатели, обезбедувајќи трансфер и на седум албански, седум црногорски и три бугарски државјани“,
напиша Османи.
Од МНР за „360 степени“ велат дека засега сите македонски државјани што сакале да го напуштат Израел, се вратени во земјава. Наредните денови, доколку се пријави уште некој за евакуација, велат од МНР, јавноста ќе биде информирана.
Како што веќе извести „360 степени“ од Аеродромот Скопје, летот од Тел Авив пристигна околу 15 часот. Патувањето, за тие што побарале евакуација, беше бесплатно.
Поради војната во Израел се откажани голем дел од комерцијалните летови, па авиотранспортот е практично блокиран. Заминување по воздушен пат, е извесно само преку евакуациски летови.
Некои од патниците и нивните роднини кои ги чекаа во Скопје, не можеа да ги скријат солзите.
Ова не е прва група македонски граѓани кои се враќаат со евакуациски лет. Претходно, токму со лет кој го организира Црна Гора, во земјава се вратија неколку наши државјани. Пред четири дена, во Тирана, со лет на „Ер Албанија“ се вратија деветмина велешани кои во Израел престојувале како туристи.
Девет македонски туристи од Велес кои биле во Израел се евакуирани со помош на Албанија
ИЗВОР: 360stepeni.mk
