Османи го брифирал Борел за процесот на уставните измени: Да не дозволиме назадување во евроинтеграцијата

Шефот на македонската дипломатија порачал дека со отпочнувањето на процесот на усвојување на уставните измени, С Македонија докажува оти е подготвена за членство во ЕУ, а дека од Унијата очекува пристапните преговори да завршат до крајот на 2030 година

Во рамки на својата посета на Шпанија, министерот за надворешни работи Бујар Османи вчера на неформална средба го брифирал високиот претставник на ЕУ за надворешни работи и безбедносна политика, Жозеп Борел, за текот на процесот за усвојување на уставните измени кои земјава треба да ги спроведе.

За време на средбата, Османи порачал оти ниту земјава ниту ЕУ не смеат да дозволат евентуално назадување од целта на С Македонија – интеграција во Европската Унија. Додал дека со отпочнувањето на процесот на усвојување на уставните измени, С Македонија докажува оти е подготвена за членство во ЕУ, а дека од Унијата очекува пристапните преговори да завршат до крајот на 2030 година.

„Уверувајќи го Борел за максималните напори на Владата за европеизација на целокупниот политички систем преку веќе утврдените неопходни реформи, рефлектирани и во позитивните извештаи на Европската комисија, Османи го поздрави новиот план за развој на Европската комисија како навремен одговор на нашето барање за повеќе интеграција и бенефити за нашите граѓани вдолж патот кон пристапно членство“,

се додава во соопштението на МНР.

Шефот на македонската дипломатија и високиот европски претставник размениле мислења и за други актуелни теми, со акцент на последните случувања во регионот, а станало збор и за соработката меѓу Унијата и ОБСЕ, со која претседава министерот Османи.