Светот никогаш не бил толку блиску до претворање на локална војна во светска војна. Веројатноста за тоа се зголемува од ден на ден, рече Орбан
Се зголемува веројатноста војната во Украина да се претвори во глобален конфликт, изјави денеска унгарскиот премиер Виктор Орбан.
Говорејќи на државното радио „Кошут“, унгарскиот премиер ги критикуваше западните лидери и ги обвини сојузниците на Украина дека го промовираат конфликтот поради економски интереси.
„Светот никогаш не бил толку блиску до претворање на локална војна во светска војна. Веројатноста за тоа се зголемува од ден на ден“,
рече Орбан.
Унгарскиот премиер, исто така, без никакви докази, рече дека сојузниците на Киев би можеле да испратат војници да ѝ помогнат на Украина која се бори против инвазијата на рускиот претседател Владимир Путин.
„Многу е веројатно, предлогот од сојузниците, нивните војници да ја преминат границата, да стане сериозен“,
рече тој.
Орбан, кој негуваше блиски односи со Кремљ во изминатата деценија, беше на удар на критики во текот на изминатата година за промовирање на рускиот наратив за војната.
Унгарската влада, пак, од друга страна, тврдеше дека е за итен прекин на огнот затоа што мирот на европскиот континент е приоритет, пишува Политико.
Во интервјуто за радиото, унгарскиот лидер инсистираше на тоа дека неговата позиција ја споделуваат и други низ светот, вклучително и Кина, арапскиот свет и Африка.
„Постои Запад и останатите,“
рече Орбан.
Извор: 360stepeni.mk
