КАРТУМ (АА) – Обединетите нации (ОН) соопштија дека 19 хуманитарни работници се убиени во 17 напади од избувнувањето на војната на 15 април во Судан меѓу Суданските вооружени сили (САФ) и Силите за брза поддршка (РСФ), пренесува Анадолу.
„Откако избувна конфликтот низ Судан во средината на април, земјата стана едно од најопасните и најтешките места во светот за работа за хуманитарците, со 19 хуманитарни работници убиени во 17 напади само оваа година“, соопшти Канцеларијата на ОН за координација за хуманитарни прашања (OCHA).
ОН, исто така, ги предупреди двете страни дека нападите врз хуманитарните работници се јасно кршење на меѓународните закони.
Се нагласува дека се ограбени магацини и други хуманитарни објекти.
„Хуманитарните установи, исто така, беа постојано напаѓани, со најмалку 53 ограбени магацини, ограбени 87 канцеларии и украдени 208 возила заклучно со 13 август“, се додава во соопштението.
Двете завојувани страни потпишаа хуманитарен договор во Џеда, Саудиска Арабија, во јуни, со кој беше одобрено отворање на хуманитарни коридори за доставување помош на цивилите. Сепак, примирјето беше повеќепати прекршено од двете страни.
Според ОН и локалните и меѓународните организации за човекови права, од избувнувањето на војната во земјата, повеќе од 4 милиони луѓе се раселени и илјадници загинаа.
