ИСТАНБУЛ (АА) – Повеќе од 100 луѓе се убиени во судирите во државата Северен Дарфур во западен Судан, изјави денес високиот комесар на Обединетите нации за бегалци, Филипо Гранди, пренесува Анадолу.
„Во насилните судири во и околу камповите за раселените во Северен Дарфур загинаа над 100 луѓе“, напиша Гранди на Твитер. „Постојат шокантни извештаи за ужасно сексуално насилство врз жени и девојчиња.“
Официјалниот претставник на ОН предупреди дека ситуацијата ќе се влоши „освен ако страните во конфликтот не се согласат да ги прекинат судирите што го уништуваат Судан“.
Судан е опустошен од судири меѓу Армијата и паравоената група Сили за брза поддршка (РСФ) од средината на април. Според локалните медицински лица, речиси 1.000 цивили се убиени, а илјадници се повредени во насилствата.
Меѓународната организација за миграции (ИОМ) проценува дека повеќе од 2,2 милиони луѓе се раселени поради тековниот конфликт во Судан.
Гувернерот на државата Западен Дарфур вчера беше киднапиран и убиен од вооружени мажи, а Армијата ги обвини РСФ за неговата смрт.
ОН вчера предупредија дека ескалацијата на нападите во Дарфур може да биде „злосторство против човештвото“.
Во последните месеци избувна несогласување меѓу двете страни за интеграцијата на РСФ во Вооружените сили на Судан – клучен услов за транзицискиот договор на Судан со политичките групи.
Судан е без функционална влада од октомври 2021 година, кога војската ја собори преодната Влада на премиерот Абдула Хамдок и прогласи вонредна состојба, потег што политичките сили го квалификуваа како „државен удар“.
Транзицискиот период на Судан, што започна во август 2019 година по соборувањето на претседателот Омар ал-Башир, треба да заврши со избори на почетокот на 2024 година.
Извор: www.aa.com.tr
