ЖЕНЕВА (АА) – Обединетите нации (ОН) објавија дека меѓу 25.000 убиени во Газа, 70 отсто се деца и жени, јавува Анадолу.
„Стигнуваме до уште една шокантна пресвртница во Газа. Според Министерството за здравство на Газа, пријавени се речиси 25.000 мртви. Меѓу нив, 70 отсто се жени и деца“, рече Аџит Сунгај, претставник на Високиот комесаријат на ОН за човекови права на окупираните палестински територии.
Тој потсети дека од 7 октомври, кога почнаа израелските напади врз Појасот Газа, повредени се најмалку 61.500 луѓе.
Сунгај напомена дека илјадници луѓе се уште под урнатините и се претпоставува дека повеќето од нив се мртви.
Истакнувајќи дека силното бомбардирање на централна Газа и подрачјето на Кан Јунус јасно се гледа од граничниот премин Рафа, Сунгај рече дека ноќите се „најстрашното“ време за жителите на Газа.
Наведе дека се сретнал со луѓето кои биле уапсени, а подоцна ослободени од Израел.
Сунгај рече дека овие луѓе кажале дека биле затворени од израелските сили на непознати места и дека биле изложени на разни тортури.
„Израел мора да преземе итни чекори за да осигура дека со сите уапсени или притворени лица се постапува во согласност со меѓународните норми и стандарди за човекови права и меѓународното хуманитарно право“, додаде Сунгај.
Извор: Anadolu Agency (AA)
