ЛОНДОН (АА) – Светската програма за храна (WFP) одлучи да ја прекине својата програма за спречување на потхранетоста во Јемен во август, наведувајќи ги „критичните празнини во финансирањето“ како главна причина, пренесува Анадолу.
Во својот последен извештај за ситуацијата во Јемен, агенцијата на Обединетите нации задолжена за давање помош во храна, рече дека клучните недостатоци во финансирањето, во комбинација со тековните прекини во снабдувањето, ја принудуваат „целосно да ги прекине активностите за спречување на потхранетоста“ од август.
„Ова ќе ѝ овозможи на Светската програма за храна да ги користи скудните ресурси што се на располагање за да ги покрие потребите на спасувачката програма за третман на умерена акутна потхранетост (МАМ)“, се вели во извештајот објавен на крајот на јули.
За да се реши критичната ситуација во Јемен, ограничените расположливи средства ќе бидат распределени на животоспасувачки програми за лекување при тешки случаи на акутна потхранетост.
Одлуката се очекува да има големо влијание врз 2,4 милиони жители во земјата кои се соочуваат со потхранетост.
Јемен е зафатен од насилства и нестабилност од 2014 година, кога бунтовниците Хуси, поврзани со Иран, зазедоа голем дел од земјата, вклучително и главниот град Сана. Ситуацијата ескалираше кога воената коалиција предводена од Саудиска Арабија влезе во војната во 2015 година за да ја врати јеменската влада.
Извор: www.aa.com.tr
