Во Основниот суд во Струга денеска започна повторно судскиот процес против градоначалникот Рамиз Мерко за набавката на луксузниот автомобил „Ауди А6“ за потребите на Општина Струга. Судењето за поставувањето на спомен обележјето на влезот на општинската зграда беше одложено поради здравствени проблеми на обвинителот кој го застапува предметот.
Расправа за набавката на автомобилот започна од почеток поради смената на судечкиот судија. На претходното рочиште, судијата побара време за разгледување на списите, а одбраната поднесе приговор за застареност на делото, кој беше одбиен од претходниот судија и исто така од новиот судија Јордан Јованов. Според Јованов, решението останува во сила бидејќи има прекин на застареноста.
„Како што беше решено и од колешката која го водеше предметот, не се прифаќа приговорот за застареност, а одлуката е задржана. Сметам дека има прекин на рокот на застареност, поради што расправата ја продолживме со изведување на докази“, изјави судијата Јордан Јованов.
Тој нагласи дека листата на сведоци е обемна, но дека ќе одлучи дали ќе ја прифати во целост, додавајќи дека нема да толерира непојавување на сведоци без оправдани причини, како што беше случајот со двајца сведоци на денешното рочиште.
„Тоа што беше дадено не се смета за оправдани причини. Судот има механизам за донесување на сведокот доколку тој одбегнува да се појави“, посочи судијата Јованов.
Според него, делото нема да биде апсолутно застарено пред 2028 година.
На денешното рочиште, по барање на одбраната, сведочеше Наде Бојаџиевска, ревизор во Државниот завод за ревизија, која беше дел од тимот што вршел ревизија во Општина Струга во 2019 година. Таа потврди дека останува на податоците од ревизорскиот извештај за 2018 година.
Одбраната на Мерко го толкува извештајот како доказ дека не постоела незаконитост во постапката за набавка на возилото.
Процесот започна во април минатата година, а Мерко се товари за злоупотреба на службената положба поради набавката на четири моторни возила, вклучувајќи го и „Ауди А6“, во вкупна вредност од 114.000 евра. Набавката е обвинувана за оштетување на буџетот на општината во време кога имала неплатени долгови и блокирана жиро-сметка. Според последните измени на Кривичниот законик, за злоупотреба на службена положба, предвидена е казна затвор од една до четири години.
Рамис Мерко е на „црната листа“ на Соединетите Американски Држави (САД) поради обвиненија за корупција и има девет обвиненија за несовесно работење во службата.
ИЗВОР: ТВ 21
