Од синоќа, но и рано утринава, Демократското движење најави прес-конференција на која, според најавата, се очекуваше изјава да даде лидерот на партијата, а воедно и министер за животна средина и просторно планирање, Изет Меџити.
Еден час по оваа објава, опозициската ДУИ излезе со соопштение во кое се наведува дека Државниот управен инспекторат констатирал „злоупотреба на службената должност“ од страна на министерот за животна средина, Изет Меџити и неговиот кабинет и како што пишуваат од ДУИ, на Меџити му се одземени овластувањата и се пренесени на Управата за животна средина и институцијата е ставена под контрола на директор назначен од ВМРО-ДПМНЕ.
По ова, на прес-конференцијата што ја најави ДД, наместо Меџити се појави Башким Хасани, кој не одговори на обвинувањата на ДУИ.
-Косовската компанија денес ни овозможи прекрасна обука, затоа тоа не измори и физички и психички и сме фокусирани само на обуката. Што се однесува до политичките работи, верувам дека ќе има изјави во наредните денови, изјави Башким Хасани, претставник на Демократско движење.
На изјавата на ДУИ реагираше Министерството за животна средина. Во целиот одговор никаде нема демант или појаснување за она што го тврди ДУИ, но реакцијата е политичка, пишувајќи дека ДУИ не може да се помири со фактот дека албанскиот народ им ги презеде овластувањата да владеат со него, по 22 години последователни неуспеси, лошо управување и масовна корупција.
Но со демант излезе Министерството за администрација од каде велат дека ДУИ шири лаги и ја дезинформира јавноста, бидејќи Државниот управен инспекторат нема ингеренции за одземање на надлежности на министри, ниту за водење истраги за корупција.
На крајот Министерството за јавна администрација уверува дека преку Државниот управен инспекторат, нема да дозволи политички структури да го злоупотребуваат системот за свои дневнополитички цели.
ИЗВОР: ТВ 21
