Наместо доследност во застапување на правните принципи и закон кој ќе биде донесен по широка јавна расправа, добивме разочарување. Граѓанските здруженија и невладини организации незадоволни од одлуката на претседателката Гордана Силјановска Давкова да го потпише указот за измените на законот за урбанистичко планирање. Предупредуваат дека состојбата на терен веќе е катастрофална а ветувањата за изградба на градинки, училишта и болници се само мал дел од измените кои ќе следуваат…
„Ние не бараме таа да цени дали пратениците ќе гласаат за или против, туку нејзино лично толкување дали е во редедни вакви битни измени во законот да се носат на овој начин. Тоа е нејзина одлука а не поддршка на тоа дека пратениците поддржуваат едни такви катастрофални измени во законот“ вели Татјана Стојановска.
Како што вели Стојановска, во земјава веќе има пример кога по забелешка на претседателот, законското решение е променето. За несериозна ја сметаат и најавата дека измените се привремени.
„Во минатото претседателот Пендаровски исто така имаше една таква ситуација во која што пратениците со дури 72 гласа за, исто така одлучија да изгласаат закон за легализација на дивоградби но тогаш претседателот Пендаровски одлучи дека нема да го потпише законот. Истиот го врати во собрание и потоа законот беше повлечен од самата влада. Ние збориме за измени на закон што ќе биде на сила. Кога тој е на сила, тоа не е привремено, тоа е додека се донесе нов закон“, додава Стојановска.
Апелите и барањата на здруженијата и невладините организации не ја предомислија претседателката силјановскја давкова која најави дека ќе стави потпис на указот за измените на законот за урбанистичко планирање ..И покрај тоа што законот ќе стапи на сила, побара од министерот за транспорт веднаш да почне со работа на подготовка на нов закон, овој пат со учество на невладиниот сектор и на опозицијата …
„Ќе го потпишам законот, мислам дека денеска или утре тоа треба да се направи..Тоа е првото, второто, еве го помикувам министерот да почне работата на новиот закон да го решиме проблемот системски бидејќи законот не е добар, сите знаеме. Соочени сме со хаос во урбанизмот, сите го гледаме тоа и мораме да ставиме крај“, рече претседатеката Гордана Силјановска Давкова.
На 13 август по скратена постапка, Собранието ги изгласа измените на Законот за урбанистичко планирање предложени од Министерството за транспорт и врски. Во одбрана на законот, министерот Николовски порача дека со измените ќе бидат одглавени 600 детални урбанистички планови, а ќе бидат олеснети и процедурите за градба на објекти од јавен интерес, како училишта, градинки, болници, амбуланти и катни гаражи, додавајќи дека ова ќе важи само за објекти во целосна сопственост на државата или општината.
Извор: 24vesti.mk
