АНКАРА (АА) – Новоизбраниот претседател на Големото народно собрание на Република Туркије (ТБММ), Нуман Куртулмуш, ја презеде функцијата од привремениот челник на турскиот Парламент и лидер на Партијата за национално движење (МХП), Девлет Бахчели, јавува Анадолу.
Новиот состав на турскиот Парламент го избра Нуман Куртулмуш, заедничкиот кандидат на владејачката Партија на правдата и развојот (АК Партија) и Партијата за национално движење (МХП) за свој нов претседател.
Куртулмуш, парламентарниот претставник на АК Партија од Истанбул, доби 321 глас во третиот круг гласање и избран е за мандат во траење од две години.
Во пресрет на примопредавањето на должноста, Куртулмуш му се заблагодари на својот претходник Бахчели и истакна дека Туркије зад себе остави еден и влегува во нов историски период.
„Овој 28. состав на Парламентот го означува почетокот на визијата на ‘Столетието на Туркије’. Има многу работа за завршување. Очекувам единство и дијалог. Нашите мислења може да се разликуваат, но сите мора да бидеме во состојба да ги исполниме очекувањата на оваа нација со средба на заедничките точки, со цел да напредуваме. Искрено верувам дека овој Парламент ќе направи позитивни работи во дијалогот“, порача Куртулмуш.
Говорејќи на церемонијата на примопредавање, Бахчели истакна дека турската нација влегла во нова ера со изборот на претседател на Големото народно собрание.
„Како член на Парламентот, ветувам пред нацијата дека ќе му бидеме поддршка на нашиот претседател во сите прашања“, рече Бахчели.
Новиот претседател на Големото народно собрание на Туркије, Нуман Куртулмуш, истакна дека турскиот народ и на овие избори му ја даде довербата на турскиот претседател Реџеп Таип Ердоган, но и на неговата Партија на правдата и развојот (AK Партија).
„Извршната и законодавната власт заедно, рака под рака, добивме можност за формирање навистина силно Собрание. Најпрво сакаме да ја искористиме оваа прилика да му се заблагодариме на нашиот народ за ова признание“, порача Куртулмуш.
Напоменувајќи дека во Големото народно собрание на Туркије има 16 политички партии, Куртулмуш рече дека тоа е многу колоритен, полифон и разновиден состав на Парламентот.
„Со овие избори нашиот народ му порача на светот дека турската демократија е демократија со високи стандарди. Ќе продолжиме да работиме за доброто на нацијата посветувајќи ги своите животи, без да губиме минута, со свесност дека овие должности што ни ги дава нашата нација се одговорности што ни се доделени“, заклучи Куртулмуш.
Извор: www.aa.com.tr
