Новоизбраните градоначалници на северот на Косово имаат нула политички легетимитет, вели известувачката за Косово во ЕП

Ако е ова реалноста – ако гледаме оклопни возила, вооружена полиција и специјални единици кои ги чуваат општинските згради деноноќно, навистина треба да размислиме за други можности и други опции. Иако Косово де јуре има право да влезе во општинските згради, де факто мислам дека нема легитимитет да се направи такво нешто, вели специјалната известувачка за Косово во Европскиот парламент, Виола фон Крамон

Новите албански градоначалници во општините во мнозинско српско население на северот на Косово можеби имаат право да ги извршуваат своите функции, но ако нивниот влез во општинските згради е можен само со присуство на вооружени полициски сили, тогаш тие имаат нула политички легитимитет.

Ова во изјава регионалниот сервис на Радио Слободна Европа го изјавила специјалната известувачка за Косово во Европскиот парламент, Виола фон Крамон.

„Мислам дека многу работи тргнуваат наопаку во оваа земја. Ако е ова реалноста – ако гледаме оклопни возила, вооружена полиција и специјални единици кои ги чуваат општинските згради деноноќно, навистина треба да размислиме за други можности и други опции“,

рече Крамон.

Според неа, потребно е решение кое би ги вклучило и локалните жители, по зголемувањето на тензиите на северот на Косово, кога групи локални Срби на 26 мај се спротивставија на влезот во општинските згради на новите албански градоначалници на Звечан, Лепосавиќ и Зубин Поток.

„Ни треба решение, треба да разговараме со луѓето на терен. Иако Косово де јуре има право да влезе во општинските згради, де факто мислам дека нема легитимитет да се направи такво нешто“,

додаде известувачката за Косово во ЕП.

Фон Крамон денеска во Приштина се сретна со косовскиот премиер Албин Курти, но не сакаше да ги открие деталите од средбата. Сепак, кажа дека таа и Курти имаат различни ставови за ситуацијата на северот на Косово.

По посетата на Приштина, известувачката за Косово во Европскиот парламент ги посети општините на северот на Косово – Звечан Лепосавиќ, Зубин Поток и Северна Митровица, чие мнозинско српско население ги бојкотираше локалните избори на 23 април, не прифаќајќи го нивниот исход.

Прашана дали ќе се сретне со претставниците на Српската листа, таа рече дека оваа партија – која е најголемата партија на Србите во Косово и ја ужива поддршката на официјален Белград – одбила да се сретне со неа.