„Новата дипломатија на САД е неконвенционална, но конвенционалната дипломатија ни донесе повеќе војни и конфликти“, вели Муцунски

Министерот за надворешни работи, Тимчо Муцунски, за време на посетата на Австралија, даде интервјуа за австралискиот јавен сервис SBS на македонски и англиски јазик.

Тој истакна дека ова е прва официјална посета на министер по 15 години, што ја одразува посветеноста на новата Влада кон македонската дијаспора. Посетата се совпаѓа со 30-годишнината од дипломатските односи меѓу двете земји.

Муцунски ги нагласи трите клучни приоритети на македонската надворешна политика: членството во НАТО, аспирациите за ЕУ и стратешкото партнерство со САД. Тој потенцираше и значењето на зголемената надворешна трговија и јакнењето на економските и политичките врски.

Муцунски се осврна и на актуелните геополитички предизвици.

„Некои можат да ги сметаат методите на новата американска администрација како неконвенционални, но треба да се прашаме – што ни донесе конвенционалната дипломатија досега? Таа ни донесе повеќе војни и повеќе конфликти. Видовме, особено во последните неколку денови, еден ефикасен ангажман од страна на претседателот Трамп и неговата администрација, како и позитивниот прием на овој ангажман од страна на претседателот Зеленски“, изјави Муцунски.

Министерот ја оцени посетата како важен чекор во продлабочувањето на билатералната соработка и зајакнувањето на врските со македонската дијаспора.