Нова трагедија во Тексас: Седум загинати откако автомобил се заби во автобуска постојка

Полицијата соопшти дека засега е нејасно дали инцидентот бил намерен или не

Седум лица загинаа во американската сојузна држава Тексас откако автомобил удри во група луѓе на автобуска постојка во близина на засолниште за бездомници и мигранти.

Инцидентот се случил во Браунсвил во близина на границата со Мексико.

Покрај загинатите, најмалку шест лица се повредени од кои некои се во критична состојба.

Возачот е уапсен, а полицијата соопшти дека засега е нејасно дали инцидентот бил намерен или не. И тој бил пренесен во болница за укажување помош, а направени му се тестови за дрога и алкохол.

Поголем дел од жртвите, според изјавите на официјални лица, се мажи од Венецуела. Медиумите потсетуваат дека несреќата доаѓа пред истекување на „ковид-политиката“ за мигранти која им овозможува на САД автоматски да ги протеруваат лицата без документи.

Ова е втора трагедија во Тексас во период од 24 часа, откако вчера во трговски центар вооружен напаѓач уби осум лица, а рани седум.

Фото: EPA-EFE/ADAM DAVIS