Новиот премиер на Нов Зеланд, Крис Хипкинс доаѓа на местото на досегашната премиерка Џасинда Ардерн, која минатата недела ја изненади јавноста објавувајќи дека си поднесува оставка, велејќи дека нема повеќе сила да продолжи со својата работа
Досегашната премиерка на Нов Зеланд, Џасинда Ардерн, вчера официјално беше сменета од премиерската функција, откако минатата недела изненадно најави дека остстапува од позицијата.
Новиот премиер Крис Хипкинс (44) положи заклетва кај генералниот гувернер на Нов Зеланд за време на церемонијата во главниот град Велингтон.
„Ова е најголемата привилегија и одговорност во мојот живот. Возбуден сум за предизвиците што претстојат“,
изјави Хипкинс по официјалното преземање на функцијата.
Хипкинс ќе биде премиер до следните општи избори во Нов Зеланд закажани за 14 октомври 2023, за кога прогнозите се дека на Лабуристичката партија ќе ѝ биде тешко да освои уште еден, трет последователен мандат, за да ја предводат владата пред конзервативната Национална партија.
Хипкинс првпат беше избран за пратеник во 2008 година, а во јавноста стана познат кога беше именуван за министер за ковид-19 во ноември 2020 година.
Сега веќе експремиерката на Нов Зеланд, Џасинда Ардерн (42), минатата недела рече дека нема повеќе сила да ја продолжи својата работа, откако ја водеше земјата во период кога се соочи со природни катастрофи, пандемијата на коронавирусот и најтешкиот терористички напад.
Таа го имаше својот последен јавен настап како премиер во средата, излегувајќи од препознатливата зграда на парламентот додека стотици граѓани ѝ аплаудираа.
ИЗВОР: 360stepeni.mk
