Повеќе
десетици илјади луѓе се собраа денеска во центарот на Осло за да му оддадат
последна почит на неодамна починатиот норвешки крал Харалд V, чија погребна
поворка се движи од Кралската палата до Катедралата во Осло.
Погребната
поворка минува низ траса долга околу 1,5 километар, а се очекува повеќе од
200.000 луѓе да се обидат да ја видат. Граѓаните почнаа да ги заземаат местата
долж трасата неколку часа пред почетокот на церемонијата.
Околу 1.900
припадници на норвешката армија од сите три рода на вооружените сили се
распоредени долж целата траса. Норвешките знамиња се спуштени на половина копје
во знак на жалост.
Центарот на
Осло е затворен за сообраќај, вклучително и за велосипеди и електрични
тротинети, додека полицијата го контролира пристапот до просторот низ кој ќе
помине поворката. Поради безбедносни мерки, на граѓаните не им е дозволено ниту
да користат чадори.
За оние што
нема да можат да пријдат доволно блиску, церемонијата ќе се пренесува на девет
големи екрани поставени на различни локации во центарот на градот.
Погребот ќе
опфати соодветни обраќања на претседателот на норвешкиот парламент и на
премиерот Јонас Гар Стере, како и церемонија на палење свеќи во која ќе
учествуваат претставници на различни вероисповести.
По погребот,
ковчегот ќе биде спроведен до тврдината Акерсхус, каде што во мавзолејот ќе се
одржи приватна церемонија.
Меѓу
останатите церемонијални настани во текот на денот ќе бидат испалени 21 почесен
топков плотун, како и појавувањето на новиот крал Хокон VIII на балконот од
кралската палата.
На погребот
на кралот Харалд V присуствуваат бројни членови на европските кралски семејства
и светски официјални лица.
Меѓу нив се
британскиот принц Вилијам и принцезата Ана, шпанскиот крал Фелипе VI, кралицата
Летиција и кралицата Софија, данскиот крал Фредерик X и кралицата Мери,
шведското кралско семејство, како и кралот Вилем-Александар и кралицата Максима
од Холандија. Во Осло пристигнаа и белгискиот крал Филип и кралицата Матилда,
како и претставници на Луксембург и Монако.
Јапонија ја
претставуваат престолонаследникот Акишино и принцезата Кико, додека Украина ја
претставува претседателот Володимир Зеленски.
Кралот
Харалд V почина на 89-годишна возраст, по 35 години поминати на норвешкиот
престол. Неговиот син, кралот Хокон VIII, кој го наследи на тронот, претходно
му оддаде емотивна почит на својот татко.
Хокон го
опиша Харалд како „добар татко, топол и духовит дедо на шест внуци, како и
грижлив сопруг на кралицата Соња“. Посебно истакна дека неговиот татко во текот
на животот останал верен на своите вредности и обврски.
„Постојано
нè потсетуваше дека секој од нас мора да го пронајде својот пат, својот стил и
да биде тоа што е“, рече новиот крал зборувајќи за својот татко.
Харалд V и
кралицата Соња требаше да ја прослават 58-годишнината од бракот еден ден по
неговата смрт.
Извор: vecer.mk
