Скопјани продолжуваат да се соочуваат со проблеми на автобуските линии, бидејќи новите еколошки автобуси, кои требаше да го подобрат јавниот превоз, сè уште не се наоѓаат на улиците, нема абер ниту од ветените стари белградски автобуси а не е ниту на повидок владиниот тендер за набавка на нови електрични.
Шесте донирани еколошки автобуси во рамките на проектот „ЕУ за чист воздух“ кои требаше да го подобрат јавниот превоз во Скопје се соочуваат со нови административни пречки, откако по примопредавањето се појавија бројни грешки во документацијата. Автобусите, произведени од турската компанија „БМЦ“ и на компримиран природен гас (ЦНГ), пристигнаа со правописни грешки на налепниците, а најголемиот проблем се откриените несогласувања во бројот на шасиите и бојата на автобусите. Наместо црвена, на документите била впишана сина боја.
По повторната процедура во Советот на Град Скопје, беа изгласани две одлуки кои го разрешуваат овој проблем и овозможуваат автобусите да бидат предадени на ЈСП.
ЈСП „Скопје“ објави јавен оглас за каско осигурување на автобусите, кој ќе трае до 23 јануари. Откако ќе бидат отворени понудите, следува законскиот период за жалби, што значи дека автобусите нема да започнат со сообраќај до февруари, а можеби и подоцна ако се појават нови проблеми со документацијата.
На прашањата испратени од Рацин.мк за причините за одолговлекувањето со пуштањето на автобусите, ЈСП „Скопје“ не одговорија, а од Град Скопје, пак, велат дека одговорите треба да бидат побарани од ЈСП, упатувајќи на институцијата која е задолжена за оваа процедура.
Град Скопје и УНОПС на ден 6.8.2024 година потпишаа Меморандум за разбирање со кој се согласија заедно да работат на проект што има за цел подобрување на јавниот превоз. Донацијата од УНОПС се состои од 6 (шест) автобуси со компримиран природен гас (ЦНГ), со цел подобрување на јавниот превоз на жителите на град Скопје.
Се очекува новите автобуси да донесат значително олеснување за јавниот превоз во Скопје, кој моментално се соочува со недостиг на возила и чест метеж во автобусите. Граѓаните и работниците во јавниот превоз се надеваат дека до крајот на месецот овие автобуси ќе започнат со работа, а се очекува и дека до крајот на годината ќе биде распишан тендер за набавка на електрични автобуси.
Ибаку веќе никој не спомнува ништо за наводната донација од Белград на шест користени автобуси, откако неколку денови стигаа разни информации и најави поврзани со веста што пристигна од соседната држава дека дел од автобусите што нема да сообраќаат во главниот град на Србија се размислува да бидат донирани за Скопје и за други градови во Македонија.
Граѓаните очекуваат и Владата да објави тендер за електричните автобуси за јавниот градски превоз, на кој, како што најави уште во ноември премиерот Христијан Мицкоски, треба да се набават меѓу 100 и 120 автобуси, од кои најголем дел за Скопје, но и за другите градови во државава, кои имаат организиран јавен градски превоз.
Соња Танеска
ИЗВОР: racin.mk
